Este blog constitúe unha porta
aberta para manter vivo o volume de Historia
da Música en Galicia editado por Ouvirmos na primavera de 2013 baixo a
autoría de Lorena López Cobas. Este volume impreso contén unha panorámica xeral
da historia da música en Galicia a través de seis capítulos, que amosan unha
revisión teórica da música feita “en e para” Galicia desde os albores da
historia até os nosos días. O obxectivo da obra non é outro que o de ofrecer
unha reconstrución histórica global -con vocación obxectiva, didáctica e
esquemática- da cultura musical galega, especialmente de cuño culto, adscrita
ao noroeste peninsular. O resultado final é un libro que adoita unha
perspectiva pedagóxica por medio dun enfoque o máis completo e claro posible,
con resumos, esquemas, glosarios e soporte visual e auditivo (contén dous CD). Aspira
en esencia a esbozar nun único texto os principais trazos que dalgún xeito
marcaron -e marcan- a historia musical de todos os tempos neste país e que
poidan interesar aos que gozan de se achegar á nosa música de xeito afeccionado ou profesional.
Como
o proxecto é moi amplo, resulta moi difícil pechar a súa elaboración, polo que
con este blog procuramos mantelo vivo na rede, envorcando datos actualizados
sobre a bibliografía, webgrafía, discografía selecta e catálogos partituras da música en Galicia,
que esperemos sexa de utilidade aos usuarios. Tamén incluímos neste blog unha
guía comentada das audicións que forman parte dos dous CD que se insiren no
volume escrito, co afán de guiar e aportar máis información a todos aqueles que
estean interesados. Do mesmo xeito, no noso Inicio procuraremos ir colgando as novas máis salientables para aqueles que estean interesados na música "académica" en Galicia.
Ningún comentario:
Publicar un comentario